दक्षिण कोरियाको सुवनमा मोना दक्षिण कोरियाद्वारा सामूहिक दसैँ टीका ग्रहण, सम्मान तथा आयव्यय सार्वजनिक कार्यक्रम आयोजना हुँदै

गोविन्द बानियाँ, दक्षिण कोरिया ।

म्याग्दी प्रवासी नेपाली संघ (मोना) दक्षिण कोरियाले बडादसैँको अवसरमा सामूहिक टीका तथा आशीर्वाद ग्रहण, ज्येष्ठ नागरिक सम्मान र संस्थाको आयव्यय विवरण सार्वजनिक गर्ने कार्यक्रम आयोजना गर्ने भएको छ । कार्यक्रम आगामी अक्टोबर २४, २०२६ शनिबार सुवनस्थित सराक एभरेष्ट रेस्टुरेन्टको सभा हलमा आयोजना हुनेछ। कार्यक्रम साँझ ९ बजेदेखि सुरु हुने आयोजकले जनाएको छ। प्रवासमा रहेर पनि नेपाली मौलिक संस्कृति, परम्परा तथा चाडपर्वको संरक्षण र प्रवर्द्धन गर्ने उद्देश्यले कार्यक्रम आयोजना गर्न लागिएको हो।

कार्यक्रममा ज्येष्ठ नागरिकबाट बडादसैँको टीका तथा आशीर्वाद ग्रहण गर्नुका साथै संस्थालाइ बिभिन्न किसिमले सहयोग गर्ने सहयोगीहरुलाइ सम्मान समेत गरिनेछ । त्यसैगरी, संस्थाको पारदर्शिता र जवाफदेहितालाई अभिवृद्धि गर्ने उद्देश्यले मोना कोरियाको आयोजनामा सम्पन्न भएको भलिबल प्रतियोगिताको आयव्यय विवरणसमेत सार्वजनिक गरिने आयोजकले जनाएको छ । दसैँ नेपाली समाजमा पारिवारिक पुनर्मिलन, आपसी सद्भाव र अग्रजप्रतिको सम्मान अभिव्यक्त गर्ने महत्त्वपूर्ण पर्वका रूपमा रहँदै आएको छ।

दक्षिण कोरियामा रहेका नेपाली समुदायबीच सांस्कृतिक सम्बन्ध सुदृढ बनाउँदै सामाजिक एकता र आत्मीयता अभिवृद्धि गर्न कार्यक्रमले योगदान पुर्‍याउने अपेक्षा गरिएको छ। आयोजकले दक्षिण कोरियामा बसोबास गर्ने सम्पूर्ण नेपाली दाजुभाइ तथा दिदीबहिनीहरूलाई कार्यक्रममा उपस्थित भई सहभागिता जनाउन आग्रह गरेको छ।