कोरियामा ११ ‘ए’ साइड चौथो 'इक्सान कप फुटबल'को तयारी तीव्र, विजेताले ३५ लाख वन पाउने

गोविन्द बानियाँ, सउल (दक्षिण कोरिया)

"परदेशमा एकता, सद्भाव र स्वास्थ्यको लागि फुटबल" भन्ने मूल नाराका साथ इक्सान नेपाली फुटबल क्लब (Iksan NFC) ले आगामी मे १०, २०२६ मा चौथो 'इक्सान कप' फुटबल प्रतियोगिता आयोजना गर्ने भएको छ । यो दक्षिण कोरियामा कमै मात्रामा आयोजना हुने ११ ए साइड प्रतियगितामध्यको एक प्रतियोगिता हो । 

दक्षिण कोरियाको इक्सानमा हुने यस प्रतियोगितामा सहभागिताका लागि क्लबले टिम दर्ता खुल्ला गरेको छ ।

नेपाल फुटबल महासंघ दक्षिण कोरियाको प्राविधिक सहयोगमा सञ्चालन हुने यस प्रतियोगितामा दक्षिण कोरियाभर रहेका नेपाली क्लबहरूले सहभागिता जनाउन सक्नेछन् । प्रतियोगिताको तयारीका लागि इक्सान नेपाली समाज र इक्सान नेपाली भलिबल क्लबले सह-आयोजकको भूमिका निर्वाह गरिरहेका छन् ।

 

प्रतियोगिताको विजेता टिमले नगद ३५,००,००० (पैंतीस लाख) कोरियन वनका साथमा ट्रफी, मेडल र प्रमाणपत्र प्राप्त गर्नेछ । त्यसैगरी, उपविजेताले २०,००,००० (बीस लाख) वन र सेमिफाइनलमा पुग्ने दुई टोलीले ४,००,००० (चार लाख) वन प्राप्त गर्ने आयोजकले जनाएको छ ।

व्यतिगत विधातर्फ उत्कृष्ट गोलरक्षक, डिफेन्डर, सर्वाधिक गोलकर्ता, मिड फिल्डर र अनुशासित टिमलाई जनही १,००,००० वन तथा प्रतियोगिताकै उत्कृष्ट खेलाडी (MVP) लाई १,५०,००० वन प्रदान गरिनेछ ।

 

मुख्य जानकारीहरू:

• प्रतियोगिता मिति: मे १०, २०२६ (आइतबार)

• दर्ता शुल्क: ४,००,००० वन

• टिम दर्ता अन्तिम मिति: मे २, २०२६ सम्म

• टाई–शिट प्रकाशन: मे ३, २०२६ (इक्सान NFC को आधिकारिक फेसबुक पेजबाट लाइभ)

• स्थान: 전북 익산시 금마면 축구장 (तेस्रो इक्शान कप भएको मैदान)

प्रतियोगितालाई भव्य बनाउन रारा रेष्टुरेन्ट इक्सानले मुख्य प्रायोजन गरेको छ भने बैंकिङ पार्टनरको रूपमा छन्बुक बैंक (Rai Nita) र रेमिट्यान्स पार्टनरको रूपमा GME रेमिट रहेका छन् । कोरियामा रहेका नेपालीहरूबीच भाइचारा बढाउन र खेलकुदका माध्यमबाट एकता कायम गर्न यस प्रतियोगिताले ठूलो सहयोग पुर्‍याउने आयोजकले लिएको छ ।

 

यसअघि मे ३ तारिकका लागी आयोजना गरिएको यो प्रतियोगिता विविध कारणले स्थगित भएको थियो । 

यो प्रतियोगिताको प्रत्यक्ष प्रसारण कोरिया अपडेट फेसबुक पेज र युट्युबमा गोबिन्द बानियाँ च्यानल मार्फत हुनेछ । 

टिम दर्ता तथा विस्तृत जानकारीका लागि खेल संयोजक दिपेन्द्र राइ तथा पदाधिकारीहरु अर्जुन सापकोटा, विवेक गुरुङ, मिशाल शाही, प्रदिप कार्की, सुनिल लिम्बु लगायतका पदाधिकारीहरूसँग सम्पर्क गर्न सकिने आयोजकले जनाएको छ ।