राजदूत डा. तुम्बाहाङ्फेको बिदाइ र 'नयाँ वर्ष सांगीतिक धमाका'को पोस्टर सार्वजनिक

गोविन्द बानियाँ सउल (दक्षिण कोरिया)
पूर्वी नेपाल समाज, किरात याक्थुङ चुम्लुङ र ग्लोबल तेह्रथुम सेवा समाजको संयुक्त आयोजनामा आइतबार सउलको दोङ्देमुनमा एक विशेष कार्यक्रम सम्पन्न भएको छ । दक्षिण कोरियाका लागि नेपाली राजदूत  डा. शिवमाया तुम्बाहाङ्फेको सम्मानमा बिदाइ कार्यक्रम र नेपाली नयाँ वर्षको अवसरमा आयोजना हुन लागेको 'नयाँ वर्ष सांगीतिक धमाका २०२६' को पोस्टर सार्वजनिक गरिएको हो ।

सम्मान ग्रहण गर्दै राजदूत डा. तुम्बाहाम्फेले आफ्नो कार्यकालमा कोरियाली सरकार र यहाँ रहेका नेपाली समुदायबाट पाएको सहयोगप्रति आभार प्रकट गर्नुभयो । तेह्रथुम जिल्लामा जन्मिएर राजनीति र कुटनीतिमा सक्रिय डा. तुम्बाहाम्फेले यसअघि नेपालमा कानुन, न्याय तथा संसदीय मामिला मन्त्री र प्रतिनिधि सभाको उपसभामुखको जिम्मेवारी समेत सम्हालिसक्नुभएको छ ।

उहाँ हालै कोरियामा 'उत्कृष्ट राजदूत अवार्ड २०२६' बाट समेत सम्मानित हुनुभएको थियो ।

सोही अवसरमा पूर्वी नेपाल समाज दक्षिण कोरियाद्वारा आगामी नयाँ वर्षको उपलक्ष्यमा आयोजना गर्न लागिएको "नयाँ वर्ष सांगीतिक धमाका २०२६" को औपचारिक पोस्टर समेत सार्वजनिक गरिएको छ । उक्त सांगीतिक कार्यक्रमको प्रचार–प्रसार र तयारीका बारेमा जानकारी दिन पत्रकार सम्मेलन समेत आयोजना गरिएको थियो ।

पूर्वी नेपाल समाजका अध्यक्ष केदार निरौलाको अध्यक्षतामा सम्पन्न उक्त कार्यक्रममा महासचिव गोविन्द बीसी, संस्थाका पदाधिकारीहरू, विभिन्न सञ्चार माध्यमका प्रतिनिधिहरू र स्थानीय नेपाली समुदायको उल्लेख्य उपस्थिति रहेको थियो । कार्यक्रममा वक्ताहरूले राजदूत डा. तुम्बाहाङ्फेको आगामी व्यक्तिगत तथा सामाजिक जीवनको पूर्ण सफलताको कामना गरेका थिए ।