कोरियाको एउटा गाउँ जहाँ १७ बर्षपछी बच्चा जन्मियो

गोविन्द बानियाँ, सउल/दक्षिण कोरिया ।
दक्षिण कोरियाको छुङछननाम्दोस्थित एउटा ग्रामीण क्षेत्र युन्हाम्यन मा १७ वर्षपछि पहिलोपटक शिशुको जन्म भएको छ । १७ बर्षको अवधिमा त्यो क्षेत्रमा कुनै पनि नयाँ शिसुको जन्म भएको थिएन । यो शिसुजन्मलाइ त्यहाँका स्थानियहरुले ठुलो पर्वका रुपमा मनाएका छन् । होङ्सङगुन का अधिकारीहरूले जनाएअनुसार कम्बोडियाबाट आएकी आप्रवासी महिला श्रेदानी र उनका पति जङ हे दक दम्पतीलाइ गत मार्च १९ मा पुत्रलाभ भएको थियो । ‘योंग-जुन’ नाम राखिएको उक्त शिशुको जन्म यो गाउँमा १७ वर्षयताको पहिलो घटना हो । शिशुको जन्मसँगै गाउँभर खुसीयाली छाएको छ। स्थानीय संघसंस्थाहरूले गाउँका विभिन्न स्थानमा बधाई सन्देशसहितका ब्यानर टाँसेका छन्। ती ब्यानरहरूमा २०२६ मा उन्हाम्यन मा आएको विशेष उपहार—श्रेदानी र उनका पति जङ हे दक दम्पतीका छोरा जङ योङ जुन को जन्ममा हार्दिक बधाई” भन्ने सन्देश लेखिएको छ ।

 

यसैबीच, सोही गाउँको एकमात्र प्राथमिक विद्यालयमा यस वर्ष कक्षा १ मा चार जना नयाँ विद्यार्थी भर्ना भएका छन्। नयाँ भर्नासँगै विद्यालयमा कुल विद्यार्थी संख्या १७ पुगेको छ। लामो समयदेखि विद्यार्थी अभाव झेल्दै आएको विद्यालयका लागि यो महत्वपूर्ण उपलब्धि मानिएको छ । तर यी सकारात्मक घटनाहरू देशव्यापी जनसांख्यिक संकटको पृष्ठभूमिमा भएका हुन्। उन्हाम्यनमा विगत एक दशकदेखि जनसंख्या निरन्तर घट्दै आएको छ। तथ्यांकअनुसार सन् २०१५ मा २,६२८ रहेको जनसंख्या सन् २०२२ मा २,१९७, सन् २०२३ मा २,१५३ मा झरेको थियो। सन् २०२४ मा २,०५७ पुगेको जनसंख्या गत वर्ष जुलाईमा २,००० भन्दा तल झर्दै १,९९१ मा सीमित भएको थियो। मार्च १९ सम्मको विवरणअनुसार, अहिले उक्त क्षेत्रमा १,१३४ घरधुरीमा जम्मा १,९५४ जनसंख्या मात्र बाँकी रहेको छ। यससँगै उन्हाम्यन, होङ्सङगुन भित्रको दोस्रो सबैभन्दा सानो बस्तीको रूपमा दर्ज भएको छ। होङ्सङ गुनका प्रमुख ले १७ वर्षपछि शिशुको जन्म र नयाँ विद्यार्थी भर्ना हुनु सम्पूर्ण क्षेत्रका लागि ठूलो खुसीको विषय भएको बताए।