कोरियामा प्रथम म्याग्दी पालिका स्तरीय खेलाडी छनोट भलिबल प्रतियोगिता–२०२६ आयोजना

गोविन्द बानियाँ सउल, दक्षिण कोरिया ।

दक्षिण कोरियामा रहेका म्याग्देली खेलाडी छनोट तथा भेटघाट का लागि “प्रथम म्याग्दी पालिका स्तरीय खेलाडी छनोट भलिबल प्रतियोगिता–२०२६” आयोजना हुने भएको छ। म्याग्दी प्रवासी नेपाली संघ (मोना) दक्षिण कोरियाको आयोजनामा हुन लागेको उक्त कार्यक्रम आगामी अप्रिल ५, २०२६ (आइतबार) का दिन 경기도 평택시 정북면 원율북로 23번길 19-7 मा सञ्चालन गरिनेछ।

कार्यक्रमको मुख्य उद्देश्य दक्षिण कोरियामा रहेका म्याग्देलीहरूबीच आपसी भेटघाट, सम्बन्ध सुदृढीकरण तथा माेना काेरियाकाे टिमका लागी उत्कृष्ट खेलाडी छनोट गर्नु रहेको आयोजकले जनाएको छ।

प्रतियोगितामा प्रथम हुने टिमले ६ लाख वन नगदसहित ट्रफी र मेडल  प्राप्त गर्नेछ भने द्वितीय हुने टिमलाई ३ लाख वन नगदसहित मेडल प्रदान गरिनेछ। साथै उत्कृष्ट खेलाडीलाई ५० हजार वन नगदसहित मेडल प्रदान गरिनेछ।

टिम दर्ता शुल्क २००,००० वन तोकिएको छ भने दर्ताको अन्तिम मिति मार्च २९, २०२६ दिउँसो १२:०० बजेसम्म रहेको छ। इच्छुक  टिमहरूले समयमै दर्ता गरी प्रतियोगितामा सहभागिता जनाउन आयोजकले आग्रह गरेको छ। प्रतियोगितासँगै मौलिक लोकनृत्य समेत प्रस्तुत गरिनेछ, जसले नेपाली संस्कृति प्रवर्द्धनमा थप टेवा पुर्‍याउने विश्वास लिइएको छ । त्यस्तै कार्यक्रममा सेलराेटीकाे समेत व्यवस्था गरिएकाे छ । म्याग्दी जिल्लाबाट दक्षिण काेरियामा रहेका म्याग्देलीहरूबिच एकता, सहकार्य र स्वस्थ प्रतिस्पर्धाको भावना अभिवृद्धि गर्ने लक्ष्यसहित आयोजना गरिएको उक्त कार्यक्रममा कोरियामा रहेका सम्पूर्ण म्याग्देलीहरूलाई उपस्थित भई कार्यक्रम सफल बनाउन अनुरोध गरिएको छ।