दक्षिण कोरियाको आनसानमा ‘होली महोत्सव–२०२६’ आयोजना हुँदै

गोविन्द बानियाँ, सउल दक्षिण कोरिया । 
दक्षिण कोरियाको आनसानमा आगामी मार्च १ तारिख ‘होली महोत्सव–२०२६’ आयोजना हुने भएको छ। रङ्गहरुको पर्व फागु पूर्णिमालाई प्रवासमा समेत चिनाउन र नेपाली कला–संस्कृतिको संरक्षण तथा प्रवर्द्धन गर्ने उद्देश्यले कार्यक्रम गर्न लागिएको आयोजकले जनाएको छ।

 

‘सनातन साहित्य सङ्गीत साधना समूह (पाँच–स) दक्षिण कोरिया’को प्रमुख आयोजनामा हुन लागेको उक्त कार्यक्रमलाई ‘मधेशी समाज दक्षिण कोरिया’ र ‘थारु कल्याणकारीणी सभा दक्षिण कोरिया’ले सह–आयोजना गरेका छन्।

 

आयोजकका अनुसार कार्यक्रममा स्थानीय कलाकारहरुको विशेष प्रस्तुति, सांस्कृतिक झाँकी तथा होली विशेष खेलहरु समावेश गरिनेछ। कोरियामा रहेका सम्पूर्ण नेपाली समुदायलाई उपस्थित भई मनोरञ्जन लिनुका साथै संस्कृति प्रवर्द्धनमा टेवा पुर्‍याउन आग्रह गरिएको छ।

 

 

कार्यक्रम विवरण:

 

 

• मिति: २०२६ मार्च १ (आइतबार)
• समय: बिहान ११:३० बजेबाट
• स्थान: 경기도 안산시 단원구 부부로 43 (원곡동)
  आनसान माइग्रेन्ट सेन्टर अगाडिको पार्क
  आनसान (안산) स्टेशनबाट पैदल ५ मिनेटको दूरीमा

 

 

आयोजकले होलीका लागि आवश्यक रङ्ग र टिसर्ट कार्यक्रम स्थलमै उपलब्ध हुने जानकारी दिएको छ।

 

प्रवासमा नेपाली समुदायबीच एकता, सद्भाव र सांस्कृतिक आत्मीयता सुदृढ बनाउने विश्वासका साथ महोत्सव आयोजना गर्न लागिएको आयोजक पक्षले जनाएको छ।