E-9 भिषामा विदेशी बस चालकहरू दक्षिण कोरिया ल्याउने प्रस्ताव अस्वीकृत

विदेशी नागरीकहरुलाइ E-9 भिसा प्रदान गरी बस चालकको रुपमा दक्षिण कोरिया ल्याउने प्रस्ताव कोरिया सरकारले अस्वीकृत गरिदिएको छ । बढ्दो चालक अभावको समस्या समाधान गर्न सउल महानगरपालिकाले केन्द्रीय सरकार समक्ष राखेको प्रस्ताव श्रम तथा रोजगार मन्त्रालयले अस्वीकृत गरेको हो । मन्त्रालयले हाल विद्यमान भिसा कानुन, लाइसेन्सको प्रमाणीकरणको समस्या, र भाषा दक्षता लगायत कारण देखाउँदै सम्भव नरहेको बताएको हो ।

पहिलो कुरा त E-9 भिसाले काम गर्न पाउने कार्यक्षेत्रमा बस चालक छैन । दोस्रो कुरा महानगरले चालकको खोजी गरेका बसका लागी हेभि ड्राइभिङ लाइसेन्स आवश्यक पर्छ जसका लागी कोरियामा १ वर्षसम्म लाइट ड्राइभिङ् लाइसेन्स प्राप्त गरी ति सवारी चलाएको अनुभव हुनुपर्छ । साथै सवारी चालकको पेशाका निम्ति कोरियन भाषाको दक्षता उच्च चाहिन्छ । यात्रुहरुसंग राम्रोसँग बोल्न, नेभी एपहरु चलाउन तथा बसको सिस्टम पनि बुझ्नुपर्ने हुन्छ । त्यसैले पनि E-9 भिसामा भर्खरै कोरिया प्रवेश गर्ने विदेशीले चालकको रुपमा काम गर्न नसक्ने तर्क मन्त्रालयको छ । यद्यपि कानुन परिवर्तन तथा विशेष खालको कुनै अन्य भिसा प्रदान गरेर चालकको रुपमा विदेशी भित्र्याउन सकिने बारेमा छलफल भने भइरहेको छ ।

सउल महानगरपालिकाले गत महिना ग्रामीण क्षत्रलाई शहर सँग जोड्ने मार्गहरुमा सञ्चालन हुने बसहरूमा चालक अभाव रहेको भन्दै विकल्पमा यस्तो प्रस्ताव गरेको थियो ।