सलनालमा कोरियाका नेपालीहरूको बहुप्रतिक्षित ‘जोन एन्ड दि लोकल्स’ को भव्य कन्सर्ट हुँदै

गोविन्द बानियाँ, सउल दक्षिण कोरिया ।

दक्षिण कोरियामा रहेका नेपाली संगीतप्रेमीका लागि लोकप्रिय ब्याण्ड ‘जोन एन्ड दि लोकल्स’ ले लाइभ प्रस्तुति दिने भएको छ । धराने इभेन्ट्स कोरियाको आयोजनामा कोरियाली नयाँ बर्ष सलनालको अवसरमा यही फेब्रुअरी १७ (मंगलबार) सउलमा विशेष सांगीतिक कार्यक्रम आयोजना हुने भएको हो ।

‘जोन एन्ड दि लोकल्स’ को कोरिया टुर अन्तर्गत आयोजित कन्सर्ट माङ्वोल्सा स्टेशन (लाइन नम्बर १) को गेट नम्बर ४ नजिकै रहेको सिन्‍हान विश्वविद्यालय ( (망월사역 신한대학교)
Mangwolsa Station, Line No. 1, Exit Gate No. 4 ) मा आयोजना हुनेछ । आयोजकका अनुसार कार्यक्रमको हल प्रवेश दिउँसो ३ बजेदेखी खुल्ला हुनेछ । कन्सर्टको लागी टिकट शुल्क भने ५० हजार कोरियन वन तोकिएको छ ।

कार्यक्रममा जोन एन्ड दि लोकल्ससँगै ओपनिङ ब्याण्ड ‘फुल्याङ’ को प्रस्तुति रहनेछ । कार्यक्रमको सञ्चालन रेश्मा राई ले गर्नेछिन भने डिजे आरएक्स ले आफ्नो बिटमा नचाउने छन् । आयोजकले दोङ्देमुन स्टेशनको गेट नम्बर २ र ३ बाट कार्यक्रम स्थलसम्म शटल बसको व्यवस्था समेत गरिएको जनाएको छ ।

दक्षिण कोरिया टुर अन्तर्गत आयोजना हुन लागेको यो कन्सर्ट नेपाली समुदायबीच अत्यन्तै प्रतीक्षित कार्यक्रमका रूपमा हेरिएको छ । अनलाइन टिकटिङ पार्टनरका रूपमा जिमनी ट्रान्स रहेको छ जहाँबाट तपाइँले सजिलै टिकट काट्न सक्नुहुनेछ ।

कार्यक्रम सफल बनाउन विभिन्न संघ–संस्था, व्यवसायिक प्रतिष्ठान तथा सञ्चारमाध्यमहरूले सहकार्य गरेका छन् । आयोजकले कोरियामा रहेका नेपाली युवायुवती तथा संगीतप्रेमीहरूलाई कार्यक्रममा उपस्थित भई मनोरञ्जन लिन आग्र गरेको छ ।