एनआरएनए पूर्व अध्यक्ष कुँवरको नेपालमा लगानी, कोरियन प्रविधिको ‘ओरा’ सौन्दर्य सामग्री उत्पादन सुरु

गोविन्द बानियाँ, सउल दक्षिण कोरिया । गैरआवासीय नेपाली संघ (एनआरएनए) का पूर्व अध्यक्ष बिनोद कुँवरको लगानीमा कोरियन प्रविधिमा आधारित ‘ओरा’ ब्रान्डका सौन्दर्य सामग्री उत्पादन नेपालमा सुरु भएको छ।

नेपालका लागि दक्षिण कोरियाली राजदूत पार्क थे यङले आइतबार काठमाडौंमा आयोजित एक विशेष समारोहका बीच ‘ओरा कसमेटिक्स’को औपचारिक उद्घाटन गरेका हुन् । ३० वर्षभन्दा बढीको अन्तर्राष्ट्रिय अनुभव, कोरियन प्रविधि तथा इन–हाउस उत्पादन प्रणाली ओरा ब्रान्डका प्रमुख विशेषता रहेका छन् ।

लामो समयदेखि आयातमा निर्भर रहेको नेपाली सौन्दर्य उद्योगमा ओरा कसमेटिक्सको प्रवेशलाई आयात प्रतिस्थापन र क्षेत्रीय बजार लक्षित उद्यमशील रणनीतिका रूपमा हेरिएको छ। एनआरएनएका पूर्व अध्यक्ष कुँवरको नेतृत्वमा अघि बढाइएको यस परियोजनाले कोरियन प्रविधि र फर्मुलेसन नेपालमा स्थानान्तरण गरी स्वदेशमै उत्पादन गर्ने नीति अपनाएको छ।

हाल नेपाली बजारमा प्रयोग हुने अधिकांश स्किनकेयर तथा मेकअप सामग्री कोरिया, भारत, चीन र युरोपबाट आयात हुँदै आएको अवस्थामा ओरा ब्रान्डले उत्पादन लागत घटाउने, आपूर्ति प्रणाली सुदृढ गर्ने तथा उपभोक्तालाई गुणस्तरीय सामग्री उचित मूल्यमा उपलब्ध गराउने लक्ष्य लिएको छ।

ओरा कसमेटिक्सलाई कोरियाली सौन्दर्य सामग्री उत्पादन तथा निर्यातमा ३० वर्षभन्दा बढी अनुभव भएका वरिष्ठ विज्ञहरूले परामर्श दिएका छन्। ती विज्ञ विश्वप्रसिद्ध कोरियाली ब्रान्डमा अनुसन्धानकर्ता तथा कसमेटिक्स डेभलपरका रूपमा कार्यरत रहिसकेका छन्। यसका कारण ओरा ब्रान्डका उत्पादनहरू अन्तर्राष्ट्रिय मापदण्ड, वैज्ञानिक परीक्षण तथा कोरियन स्किनकेयर दर्शनअनुसार विकास गरिएको कम्पनीको दाबी छ।

परियोजनामा हालसम्म करिब १५ करोड रुपैयाँ लगानी भइसकेको छ भने दोस्रो चरणमा थप १० करोड रुपैयाँ लगानी गरिने योजना रहेको छ। कम्पनीले अत्याधुनिक मेसिनरी तथा उत्पादन उपकरण जडान गरिसकेको र छिट्टै व्यावसायिक उत्पादन सुरु गर्ने तयारी गरेको जनाएको छ। पूर्ण सञ्चालनपछि नेपालमै स्किनकेयर, कसमेटिक्स तथा बडी केयरका १०० भन्दा बढी प्रकारका उत्पादन निर्माण गर्न सकिने बताइएको छ।

अर्थशास्त्री तथा बजार विश्लेषकहरूका अनुसार ओरा कसमेटिक्सको रणनीति दुई तहमा केन्द्रित छ—पहिलो, स्वदेशी बजारमा आयात प्रतिस्थापन र दोस्रो, मध्यम अवधिमा भारत र चीनजस्ता ठूला बजारमा प्रवेश। गुणस्तरअनुसार सुलभ मूल्य नीति अपनाइएकाले घरेलु बजारमा छिटो स्थापित हुने र क्षेत्रीय बजारमा प्रतिस्पर्धी बन्ने सम्भावना रहेको उनीहरूको विश्लेषण छ।

एनआरएनए अभियानपछि उद्यमशीलतामा फर्किएका कुँवरको यो पहललाई रेमिटेन्समा निर्भर अर्थतन्त्रबाट उत्पादनमुखी अर्थतन्त्रतर्फको सकारात्मक संकेतका रूपमा लिइएको छ। उद्योग सञ्चालनले स्थानीय रोजगारी सिर्जना, स्वदेशी उद्योगसँग सहकार्य तथा वैदेशिक मुद्रा बचतमा योगदान पुर्‍याउने अपेक्षा गरिएको छ।

उद्घाटन समारोहमा बोल्दै कोरियाली राजदूत पार्क ते–यङले कोरियन प्रविधि र नेपाली उद्यमशीलताको संयोजनले नेपालमा नयाँ औद्योगिक सम्भावना खोल्ने विश्वास व्यक्त गरे। निजी क्षेत्रमार्फत नेपाल–कोरिया आर्थिक सहकार्यलाई संस्थागत बनाउने दिशामा यो परियोजना महत्वपूर्ण हुने उनको भनाइ थियो।

समग्रमा, ओरा कसमेटिक्सलाई नयाँ सौन्दर्य ब्रान्डका रूपमा मात्र नभई उत्पादनमुखी, निर्यातमुखी तथा क्षेत्रीय बजार लक्षित आर्थिक परियोजनाका रूपमा आर्थिक क्षेत्रले चासोका साथ हेरिरहेको छ