काेरियाकाे बुसानमा Gen-Z आन्दोलनमा ज्यान गुमाएकाहरूको सम्झनामा श्रद्धाञ्जली

दक्षिण काेरियाकाे बुसानस्थित नेपाली समुदाय (NCB) ले कोरियामा रहेका नेपाली विद्यार्थीहरूको छाता संगठन समाजिक संस्था SONSIK (Society of Nepalese Students in Korea) सँग मिलेर नेपालमा हालैको Gen-Z आन्दोलनका क्रममा ज्यान गुमाएका विद्यार्थीहरूको सम्झनामा दिप प्रज्वलन तथा श्रद्धाञ्जली कार्यक्रम आयोजना गरेको छ।
यो कार्यक्रम बुसानको क्युङसुङ विश्वविद्यालय (Kyungsung University) मा सम्पन्न भएको थियो, जहाँ नेपाली विद्यार्थी, समुदायका सदस्यहरू र सहयोगीहरूले भेला भएर दिवंगत आत्माहरूलाई श्रद्धाञ्जली अर्पण गर्दै पीडित परिवार तथा सम्पूर्ण नेपाली जनताप्रति ऐक्यबद्धता प्रकट गरे।
कार्यक्रमका आयोजकहरूले युवाहरूको असामयिक निधनप्रति गहिरो दुःख प्रकट गर्दै नेपालले सामना गरिरहेको यस कठिन घडीमा शान्ति र एकताको आवश्यकता रहेको जोड दिएका थिए।
बुसानस्थित नेपाली समुदाय (NCB) ले निरन्तर रूपमा नेपालीहरूलाई सहयोग गर्दै सांस्कृतिक, सामाजिक तथा जनचेतनामूलक कार्यक्रम गर्दै आएको छ। SONSIK को सहकार्यमा गरिएको यो दिप प्रज्वलन कार्यक्रमले फेरि पनि समुदायलाई एउटै मञ्चमा ल्याएको छ र स्वदेशबाट टाढा रहँदा पनि आशा र सम्झनाका आवाज प्रकट गर्ने अवसर दिएको छ।
कार्यक्रमका सहभागीहरूले छोटो समयमा स्थान उपलब्ध गराइदिएको क्युङसुङ विश्वविद्यालयप्रति आभार व्यक्त गरे साथै कार्यक्रमलाई सफल बनाउन सहयोग गर्ने SONSIK र श्रद्धाञ्जली अर्पण गर्न उपस्थित सबैप्रति धन्यवाद प्रकट गरे।